ນະຄອນຫຼວງ ເລັ່ງແກ້ໄຂ 4 ຈຸດທີ່ມີການສັນຈອນແອອັດ

    ເພື່ອ​ເປັນ​ການ​ແກ້​ໄຂ​ການ​ສັນ­ຈອນ​ແອ​ອັດ ຫຼຸດ­ຜ່ອນ​ການ​ເກີດ​ອຸ­ບັດ­ເຫດ ແລະ ແກ້​ໄຂ​ຫາງ​ສຽງ​ຈົ່ມ​ວ່າ​ຂອງ​ສັງ­ຄົມ ກໍ​ຄື​ຜູ້​ໃຊ້​ລົດ​ໃຊ້​ຖະ­ໜົນ ດັ່ງ­ນັ້ນ ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ​ນະ­ຄອນ­ຫຼວງ​ວຽງ​ຈັນ (ຍທຂ ນວ) ໄດ້​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ ເປັນ­ຕົ້ນ​ຕຳ­ຫຼວດ​ຈະ­ລາ­ຈອນ ປັບ­ປຸງ​ໄຟ​ອຳ­ນາດ (ໄຟ​ແດງ) ແລະ ການ​ຈອດ​ລົດ​ຊະ­ຊາຍ​ບາງ​ຈຸດ​ຢູ່​ຖະ­ໜົນ​ໄກ­ສອນ ພົມ­ວິ­ຫານ ແລະ ຖະ­ໜົນ​ດົງ​ໂດກ.

    ທ່ານ ສີ​ວອນ ຊັບ​ທະ­ວີ ຫົວ­ໜ້າ​ຂະ­ແໜງ​ຄຸ້ມ​ຄອງ​ການ​ຂົນ­ສົ່ງ ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ນວ ໃຫ້​ສຳ­ພາດ​ວັນ​ທີ 24 ມີ­ນາ 2020 ວ່າ: ອີງ​ຕາມ​ຂໍ້​ຕົກ­ລົງ​ວ່າ​ດ້ວຍ​ການ­ຈັດ­ຕັ້ງ ແລະ ການ­ເຄື່ອນ­ໄຫວ​ຂອງ​ພະ​ແນກ ຍທຂ ລົງ​ວັນ​ທີ 24 ສິງ­ຫາ 2018 ອີງ​ຕາມ​ບົດ​ບັນ­ທຶກ​ກອງ​ປະ­ຊຸມ​ປຶກ­ສາ​ຫາ­ລື​ຄັ້ງ​ວັນ​ທີ 13 ມີ­ນາ 2020 ແລະ ອີງ​ຕາມ​ການ​ລົງ​ສຳ​ຫຼວດ​ກວດ­ກາ​ຕົວ​ຈິງ ແລະ ຄຳ​ແນະ­ນຳ​ຂອງ​ທ່ານ​ລັດ­ຖະ­ມົນ­ຕີ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ຄັ້ງ​ວັນ​ທີ 17 ມີ­ນາ 2020 ມາ​ຮອດ​ວັນ​ທີ 19 ມີ­ນາ 2020 ພະ​ແນກ ຍທຂ ນວ ໄດ້​ເຮັດ​ບົດ​ລາຍ​ງານ​ເຖິງ​ຫ້ອງ​ວ່າ­ການ​ປົກ­ຄອງ ນວ ວ່າ: ໃນ​ສະ­ພາບ​ການ​ສັນ­ຈອນ​ຢູ່​ເຂດ​ເມືອງ​ໄຊ​ທາ­ນີ ເປັນ­ຕົ້ນ​ຢູ່​ເຂດ​ໄຟ​ອຳ­ນາດ​ທາງ​ເຂົ້າ​ເຮືອນ​ພັກ​ຊີ­ເກມ​ໃນ​ໂມງ​ເລັ່ງ​ດ່ວນ ເຫັນ​ວ່າ­ການ​ສັນ­ຈອນ​ຢູ່​ເຂດ​ນັ້ນ​ມີ​ຄວາມ​ແອ​ອັດ​ສົມ­ຄວນ ຈຳ­ນວນ​ພາ­ຫະ­ນະ​ທີ່​ເຂົ້າ​ມາ​ຕົວ​ເມືອງ​ມີ​ຈຳ­ນວນ​ຫຼາຍ ເປັນ­ຕົ້ນ​ມາ​ຈາກ​ທາງ​ເລກ 10 ແລະ ທາງ 13 ໃຕ້​ໂຮມ​ເຂົ້າ​ມາ​ຈຸດ​ດຽວ ໃນ​ການ​ໃຊ້​ໄຟ​ອຳ­ນາດ​ໃນ​ການ​ສັນ­ຈອນ​ນັ້ນ ເຫັນ​ວ່າ​ຕ້ອງ​ໄດ້​ລໍ­ຖ້າ​ດົນ 2-3 ຮອບ​ຈຶ່ງ​ສາ­ມາດ​ຜ່ານ​ໄດ້ ຈະ​ແຕກ​ຕ່າງ​ຈາກ 2-3 ປີ­ຜ່ານ­ມາ ແລະ ອີກ​ສາ­ເຫດ​ໜຶ່ງ ຍ້ອນ​ມີ​ລົດ​ຈອດ​ແຄມ​ທາງ ເປັນ­ຕົ້ນ​ມີ​ຮ້ານ​ປີ້ງ​ເປັດ​ຢູ່​ແຄມ​ທາງ​ບ້ານ​ດອນ​ໜູນ ເວ­ລາ​ຂາ​ເຂົ້າ ແລະ ຂາ​ອອກ ມີ​ຮ້ານ​ຂາຍ­ເຄື່ອງ​ສົ່ງ​ນາງ​ຄຳ​ຜົ້ງ ກໍ​ມີ​ລົດ​ຈອດ​ແອ​ອັດ​ຫຼາຍ ຜ່ານ​ມາ ທາງ​ຈັດ​ສັນ ແລະ ຈະ­ລາ­ຈອນ​ເມືອງ​ໄຊ​ທາ­ນີ​ໄດ້​ພະ­ຍາ­ຍາມ​ແກ້​ຢູ່ ແຕ່​ກໍ​ບໍ່​ສຳ­ເລັດ​ເປັນ​ອັນ​ຖາ­ວອນ ສະ­ນັ້ນ​ວັນ​ທີ 13 ມີ­ນາ 2020 ກົມ​ຕຳ­ຫຼວດ​ຈະ­ລາ­ຈອນ​ໄດ້​ຈັດ​ກອງ​ປະ­ຊຸມ​ໂດຍ​ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ ເພື່ອ​ຄົ້ນ­ຄວ້າ​ວາງ​ແຜນ​ກ່ຽວ​ກັບ​ການ​ແກ້​ໄຂ​ບັນ­ຫາ​ດັ່ງ­ກ່າວ ວັນ​ທີ 17 ມີ­ນາ 2020 ຄະ­ນະ​ດັ່ງ­ກ່າວ​ໄດ້​ລົງ​ເບິ່ງ​ສະ­ຖານ­ທີ່​ຕົວ​ຈິງ​ຢູ່ 4 ຈຸດ​ຄື: ເຂດ​ໄຟ​ອຳ­ນາດ​ທາງ​ເຂົ້າ​ເຮືອນ​ພັກ​ຊີ­ເກມ  ໜ້າ ຮ້ານ​ຂາຍ­ເຄື່ອງ​ນາງ ຄຳ​ຜົ້ງ ເຂດ​ໜ້າ​ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ​ມະ­ຫາ­ຊົນ ມຊ ຖະ­ໜົນ​ດົງ​ໂດກ ແລະ ເຂດ 4 ແຍກ​ໄຟ​ອຳ­ນາດ​ດົງ​ໂດກ-ທາງ 450 ປີ ຈຸດ​ທີ່​ລົດ­ເມ​ມັກ​ຈອດ​ເອົາ​ຄົນ​ໂດຍ​ສາຍ​ຂຶ້ນ.

    ໃນ​ແຕ່​ລະ​ຈຸດ ຜ່ານ​ການ​ຄົ້ນ­ຄວ້າ​ປຶກ­ສາ​ຫາ­ລື​ກັນ​ແລ້ວ ສະ­ເໜີ​ກຳ­ນົດ​ວິ­ທີ​ການ​ແກ້​ໄຂ​ຄື: ຈຸດ​ໄຟ​ອຳ­ນາດ ທາງ​ເຂົ້າ​ເຮືອນ​ພັກ​ຊີ­ເກມ ເຫັນ​ຄວນ​ປິດ​ຊົ່ວ­ຄາວ ຫ້າມ​ລົດ​ທຸກ​ປະ­ເພດ​ທີ່​ອອກ​ມາ​ຈາກ​ເຮືອນ​ພັກ​ຊີ­ເກມ ຫ້າມ​ໄປ​ຊື່ ແລະ ລ້ຽວ​ຊ້າຍ​ໄປ​ທາງ​ດອນ​ໜູນ ແຕ່​ສາ­ມາດ​ລ້ຽວ​ຂວາ​ໄດ້ ຖ້າ​ຈະ​ລ້ຽວ​ກັບ ໃຫ້​ໄປ​ລ້ຽວ​ຢູ່​ຈຸດ​ລ້ຽວ ແລະ ຈຸດ​ໄຟ​ອຳ­ນາດ​ດົງ​ໂດກ-ທາງ 450 ປີ ລົດ​ທີ່​ອອກ​ຈາກ​ຄອງ​ນ້ຳ​ບ້ານ​ນາ​ແຄ ຫ້າມ​ໄປ​ຊື່ ແລະ ລ້ຽວ​ຊ້າຍ​ໄປ​ທາງ​ດົງ​ໂດກ ແຕ່​ລ້ຽວ​ຂວາ​ໄປ​ທາງ​ດອນ​ໜູນ​ໄດ້ ຕໍ່​ກັບ​ການ​ກະ­ກຽມ​ເພື່ອ​ປະ­ຕິ­ບັດ ມອບ​ໃຫ້​ພະ​ແນກ ຍທຂ ນວ ເອົາ​ແທ່ງ​ຄອນ​ກຣີດ​ໄປ​ຕັນ​ທາງ​ກາງ ແລ້ວ​ປິດ​ລະ­ບົບ​ໄຟ​ອຳ­ນາດ ມອບ​ໃຫ້​ພະ​ແນກ​ຕຳ­ຫຼວດ​ຈະ­ລາ­ຈອນ ນວ ແລະ ກອງ­ຮ້ອຍ​ຈະ­ລາ­ຈອນ​ເມືອງ​ໄຊ​ທາ­ນີ ຈັດ​ຕັ້ງ​ກຳ­ລັງ​ລົງ​ປະ­ຈຳ​ຕິດ­ຕາມ​ຕະ­ຫຼອດ 24 ຊົ່ວ­ໂມງ ໃນ​ໄລ­ຍະ​ທົດ​ລອງ 1 ເດືອນ.

    ສ່ວນ​ຈຸດ​ຮ້ານ​ຂາຍ­ເຄື່ອງ​ນາງ ຄຳ​ຜົ້ງ ມອບ​ໃຫ້​ພະ​ແນກ ຍທຂ ນວ ສົມ­ທົບ​ກັບ​ຫ້ອງ­ການ ຍທຂ ແລະ ຈະ­ລາ­ຈອນ​ເມືອງ​ໄຊ​ທາ­ນີ​ລົງ​ເກັບ​ກຳ​ຂໍ້​ມູນ ແຕ່​ປັດ­ຈຸ­ບັນ​ໄດ້​ສຳ­ເລັດ​ອອກ​ແບບ​ການ​ປັບ­ປຸງ​ບ່ອນ​ຈອດ​ລົດ​ໜ້າ​ຮ້ານ ໂດຍ​ປັບ­ປຸງ​ແຄມ​ທາງ ແລະ ຟຸດ​ບາດ​ໃໝ່ ພາຍ­ຫຼັງ​ເຮັດ​ສຳ­ເລັດ​ແລ້ວ ທາງ​ຮ້ານ​ຕ້ອງ​ມີ​ພະ­ນັກ­ງານ​ຮັກ­ສາ​ຄວາມ​ປອດ​ໄພ​ມາ​ປະ­ຈຳ­ການ​ສັນ­ຍານ​ລົດ​ເຂົ້າ-ອອກ ສ່ວນ​ງົບ­ປະ­ມານ​ໃນ​ການ​ປັບ­ປຸງ ມອບ​ໃຫ້​ເຈົ້າ​ຂອງ​ຮ້ານ​ເປັນ​ຜູ້​ປະ­ກອບ­ສ່ວນ ເຊິ່ງ​ຈຸດ​ຈອດ​ລົດ​ປັບ­ປຸງ​ໃໝ່​ນີ້ ຖ້າ​ຈອດ​ເຕັມ​ແລ້ວ ຈະ​ບໍ່​ໃຫ້​ຈອດ​ຊ້ອນ​ກັນ​ແບບ​ຄື​ຜ່ານ​ມາ ສ່ວນ​ຈຸດ​ໜ້າ​ທະ­ນາ­ຄານ​ການ​ຄ້າ ໜ້າ ມຊ ກໍ​ເຮັດ​ຮູບ​ການ​ດຽວ​ກັນ.

    ສຳ­ລັບ​ຈຸດ 4 ແຍກ​ດົງ​ໂດກ-ທາງ 450 ປີ ໄດ້​ເອົາ​ປ້າຍ​ຫ້າມ​ຈອດ​ມາ​ຕິດ​ຕັ້ງ​ໃສ່ ແລະ ຕິດ​ຕັ້ງ​ກ້ອງ​ວົງ​ຈອນ​ປິດ​ໃສ່​ຕິດ­ຕາມ​ເປັນ​ປະ­ຈຳ ແລະ ມອບ​ໃຫ້​ເຈົ້າ​ໜ້າ­ທີ່​ປະ­ຈຳ­ການ​ປະ­ຕິ­ບັດ​ລະ­ບຽບ​ຢ່າງ​ເຂັ້ມ​ງວດ ສ່ວນ​ງົບ­ປະ­ມານ​ໃນ​ການ​ນຳ​ໃຊ້ ມອບ​ໃຫ້​ສະ­ຖາ­ນີ​ລົດ​ໂດຍ­ສານ​ສາຍ​ໃຕ້​ເປັນ​ຜູ້​ປະ­ກອບ ເຊິ່ງ​ການ​ປັບ­ປຸງ​ຈຸດ​ນີ້ ໄດ້​ເລີ່ມ​ມາ​ແຕ່​ຕົ້ນ​ເດືອນ​ມີ­ນາ 2020 ແລະ ໄດ້​ໃຫ້​ພະ­ນັກ­ງານ​ໄປ​ປະ­ຈຳ­ການ​ຢູ່​ສະ­ຖາ­ນີ​ລົດ​ໂດຍ­ສານ​ສາຍ​ໃຕ້​ຕື່ມ​ອີກ ເພື່ອ​ປະ­ຕິ­ບັດ​ຢ່າງ​ເຂົ້າ​ງວດ​ກັບ​ລົດ​ໂດຍ­ສານ​ທີ່​ມາ​ຈອດ​ຢູ່​ໃກ້​ກັບ 4 ແຍກ​ດັ່ງ­ກ່າວ ທັງ​ນີ້​ກໍ​ເພື່ອ​ເຮັດ​ໃຫ້​ໂຄງ­ການ​ແກ້​ໄຂ​ການ​ສັນ­ຈອນ​ແອ​ອັດ​ຢູ່ 4 ຈຸດ​ທີ່​ກ່າວ​ມາ​ຂ້າງ​ເທິງ​ນີ້​ມີ​ຄວາມ​ຍືນ​ຍົງ​ຕະ­ຫຼອດ​ໄປ.

ຕິດຕໍ່ພວກເຮົາ