ຕີລາຄາການເຄື່ອນໄຫວວຽກງານຮອບດ້ານ ສະຫະພັນແມ່ຍິງໃນ 9 ເດືອນຜ່ານມາ

ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ຄັ້ງ​ທີ 6 ສະ­ໄໝ​ທີ VII ຈັດ​ຂຶ້ນ​ແຕ່​ວັນ​ທີ 14-18 ກັນ­ຍາ 2020 ຢູ່​ສູນ​ເຝິກ­ອົບ­ຮົມ​ແມ່­ຍິງ​ລາວ ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຂອງ​ທ່ານ ນາງ ອິນ​ລາ​ວັນ ແກ້ວ​ບຸນ​ພັນ ປະ­ທານ​ຄະ­ນະ​ບໍ­ລິ­ຫານ​ງານ​ສູນ​ກາງ​ສະ­ຫະ­ພັນ​ແມ່­ຍິງ​ລາວ (ສສຍລ) ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ໄຊ​ສົມ​ພອນ ພົມ­ວິ­ຫານ ປະ­ທານ​ສູນ​ກາງ​ແນວ​ລາວ​ສ້າງ​ຊາດ ພ້ອມ​ຮອງ​ປະ­ທານ​ຄະ­ນະ​ບໍ­ລິ­ຫານ​ງານ ສສຍລ ປະ­ທານ​ຮອງ​ປະ­ທານ​ສະ­ຫະ­ພັນ​ແມ່­ຍິງ​ບັນ­ດາ​ກະ­ຊວງ ອົງ­ການ ແຂວງ ແລະ ນະ­ຄອນ­ຫຼວງ​ວຽງ​ຈັນ

ທ່ານ ນາງ ອິນ​ລາ​ວັນ ແກ້ວ​ບຸນ​ພັນ ກ່າວ​ວ່າ: ກອງ​ປະ­ຊຸມ​ຄັ້ງ​ນີ້ ພວກ​ເຮົາ​ຈະ​ໄດ້​ພ້ອມ​ກັນ​ສະ­ຫຼຸບ​ຕີ​ລາ­ຄາ​ຢ່າງ​ຂຸ້ນ­ຂ້ຽວ ການ­ເຄື່ອນ­ໄຫວ​ວຽກ​ງານ​ຮອບ­ດ້ານ ສະ­ຫະ­ພັນ​ແມ່­ຍິງ​ໃນ 9 ເດືອນ ແລະ ການ​ຄາດ​ຄະ­ເນ 3 ເດືອນ​ທ້າຍ​ປີ 2020 ຜ່ານ​ຮ່າງ​ບົດ​ສະ­ເໜີ​ການ­ຈັດ­ຕັ້ງ​ຜັນ​ຂະ­ຫຍາຍ​ມະ­ຕິ​ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ສະ­ຫະ­ພັນ​ແມ່­ຍິງ​ລາວ ຄັ້ງ​ທີ 5 ສະ­ໄໝ VII ສິ່ງ​ສຳ­ຄັນ ພວກ​ເຮົາ​ຈະ​ໄດ້​ຮັບ​ກຽດ​ຟັງ​ການ​ໂອ້​ລົມ​ຈາກ​ກົມ​ການ­ເມືອງ​ສູນ​ກາງ​ພັກ ເພື່ອ​ເປັນ​ເຂັມ​ຊີ້​ທິດ​ເຍືອງ​ທາງ​ໃຫ້​ແກ່​ການ​ນຳ­ພາ​ຂະ​ບວນ​ແມ່­ຍິງ ຄະ­ນະ​ບໍ­ລິ­ຫານ​ງານ​ສະ­ໄໝ​ທີ VII ຈະ​ໄດ້​ຜ່ານ​ບົດ​ສຳ​ຫຼວດ​ການ​ນຳ­ພາ ແລະ ດຳ­ເນີນ​ຊີ­ວິດ​ການ­ເມືອງ​ພາຍ​ໃນ​ຂອງ​ຕົນ ພ້ອມ​ກັນ​ນັ້ນ ເພື່ອ​ກະ­ກຽມ​ເງື່ອນ­ໄຂ​ດ້ານ​ຕ່າງໆ​ໃຫ້​ແກ່​ການ​ດຳ­ເນີນ​ກອງ​ປະ­ຊຸມ​ໃຫຍ່​ຜູ້​ແທນ​ແມ່­ຍິງ​ລາວ​ທົ່ວ​ປະ­ເທດ ຄັ້ງ​ທີ VIII ບັນ­ດາ​ສະ­ຫາຍ​ຈະ​ໄດ້​ຄົ້ນ­ຄວ້າ ປຶກ­ສາ​ຫາ­ລື ກຳ­ນົດ​ວຽກ​ງານ​ຈຸດ​ສຸມ 2020 ຜ່ານ​ຮ່າງ​ບົດ​ລາຍ​ງານ​ການ­ເມືອງ ແລະ ຮ່າງ​ທິດ​ທາງ​ແຜນ­ການ 5 ປີ (2021-2025) ຜ່ານ​ຮ່າງ​ບົດ​ສະ­ຫຼຸບ​ແຜນ​ພັດ­ທະ­ນາ 5 ປີ­ຜ່ານ­ມາ (2016-2020) ແລະ ແຜນ​ພັດ­ທະ­ນາ​ແມ່­ຍິງ​ແຫ່ງ​ຊາດ 5 ປີ​ຕໍ່­ໜ້າ (2021-2025) ຜ່ານ​ຕົວ​ແບບ​ຮ່າງ​ບົດ​ສະ­ຫຼຸບ​ການ­ຈັດ­ຕັ້ງ​ປະ­ຕິ­ບັດ​ຂໍ້​ແຂ່ງ­ຂັນ 3 ດີ ການ­ຈັດ­ຕັ້ງ​ປະ­ຕິ­ບັດ​ການ​ສ້າງ​ຄອບ­ຄົວ ແລະ ບ້ານ​ແມ່­ຍິງ 3 ດີ ຕິດ​ພັນ​ກັບ​ການ​ສ້າງ​ບ້ານ​ພັດ­ທະ­ນາ ຕາມ​ທິດ 3 ສ້າງ ແລະ ທິດ​ທາງ​ແຜນ­ການ​ຕໍ່­ໜ້າ ການ​ປັບ­ປຸງ​ຄຳ​ຂວັນ-ຂໍ້​ແຂ່ງ­ຂັນ ກົດ​ລະ­ບຽບ ການ​ກະ­ກຽມ​ຍ້ອງ­ຍໍ ແລະ ມອບ​ທຸງ­ໄຊ ຜ່ານ​ພາ­ລະ​ບົດ­ບາດ-ໂຄງ​ຮ່າງ​ການ­ຈັດ­ຕັ້ງ​ສະ­ຫະ­ພັນ​ແມ່­ຍິງ ພິ­ເສດ ພວກ​ເຮົາ​ຈະ​ໄດ້​ພ້ອມ​ກັນ​ຄົ້ນ­ຄວ້າ​ວຽກ​ບຸກ​ຄະ­ລາ​ກອນ ແລະ ທາບ​ທາມ​ບຸກ​ຄະ­ລາ​ກອນ ຮອບ​ທີ 1 ຄັ້ງ​ທີ 1 ແລະ ທີ 2 ພ້ອມ​ທັງ​ຜ່ານ​ຮ່າງ ແລະ ຮັບ­ຮອງ​ມະ­ຕິ​ກອງ​ປະ­ຊຸມ​ຄົບ​ຄະ­ນະ​ບໍ­ລິ­ຫານ​ງານ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ຄັ້ງ​ທີ 6 ສະ­ໄໝ​ທີ VII ແລະ ວຽກ​ທີ່​ສຳ­ຄັນ​ຮີບ​ດ່ວນ​ອີກ​ຈຳ­ນວນ​ໜຶ່ງ.

ພ້ອມ​ດຽວ​ກັນ​ນີ້ ທ່ານ ນາງ ອິນ​ລາ​ວັນ ແກ້ວ​ບຸນ​ພັນ ຍັງ​ໄດ້​ຮຽກ­ຮ້ອງ​ໃຫ້​ຜູ້​ແທນ​ກອງ​ປະ­ຊຸມ​ທົງ​ໝົດ ຈົ່ງ​ເຊີດ​ຊູ​ນ້ຳ​ໃຈ­ຄວາມ​ຮັບ­ຜິດ­ຊອບ ແລະ ສິດ​ປະ­ຊາ­ທິ­ປະ­ໄຕ ເພື່ອ​ພ້ອມ​ກັນ​ຄົ້ນ­ຄວ້າ ພິ­ຈາ­ລະ­ນາ ປະ­ກອບ​ຄຳ​ເຫັນ​ໃສ່​ຮ່າງ​ເອ­ກະ­ສານ ແລະ ຮັບ­ຮອງ​ເອົາ​ບັນ­ດາ​ໜ້າ​ວຽກ​ຍຸດ​ທະ​ສາດ​ໃຫ້​ມີ​ຄວາມ​ອຸ­ດົມ­ສົມ­ບູນ ມີ​ເນື້ອ​ໃນ​ໜັກ​ແໜ້ນ ຕີ​ລາ­ຄາ​ໃຫ້​ເຫັນ​ຜົນ­ງານ ບົດ­ຮຽນ​ໃນ​ການ​ນຳ­ພາ​ທີ່​ພົ້ນ​ເດັ່ນ ຊອກ​ໃຫ້​ເຫັນ​ບັນ­ຫາ​ຂໍ້­ຄົງ­ຄ້າງ ແລະ ທິດ​ທາງ ວິ­ທີ​ການ​ແກ້​ໄຂ​ໃນ 5 ປີ​ຕໍ່­ໜ້າ ເພື່ອ​ສ້າງ​ຄວາມ​ເປັນ​ເອ­ກະ​ພາບ​ໃນ​ການ­ຈັດ­ຕັ້ງ​ຜັນ​ຂະ​ຫາຍ​ເຂົ້າ​ໃນ​ວຽກ​ງານ​ຕົວ​ຈິງ​ຂອງ​ແມ່­ຍິງ​ໃນ​ທົ່ວ​ປະ­ເທດ.

ໃນ​ກອງ​ປະ­ຊຸມ ທ່ານ ໄຊ​ສົມ​ພອນ ພົມ­ວິ­ຫານ ປະ­ທານ​ສູນ​ກາງ​ແນວ​ລາວ​ສ້າງ​ຊາດ ກໍ​ໄດ້​ໃຫ້​ກຽດ​ໂອ້​ລົມ ໂດຍ​ທ່ານ​ໄດ້​ສະ­ແດງ​ຄວາມ​ຍ້ອງ­ຍໍ​ຊົມ­ເຊີຍ ຕໍ່​ບັນ­ດາ​ສະ­ຫາຍ​ຄະ­ນະ​ບໍ­ລິ­ຫານ​ງານ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ທີ່​ໄດ້​ຍົກ​ສູງ​ຄວາມ​ຮັບ­ຜິດ­ຊອບ​ຂອງ​ຕົນ ໃນ​ການ​ຜັນ​ຂະ­ຫຍາຍ​ມະ­ຕິ​ດັ່ງ­ກ່າວ​ເປັນ​ແຜນ​ງານ ໂຄງ­ການ ເພື່ອ​ນຳ­ພາ​ສະ­ຫະ­ພັນ​ແມ່­ຍິງ​ທຸກ​ຂັ້ນ​ເຄື່ອນ​ໄຫວ​ຕາມ​ສິດ​ໜ້າ­ທີ່ ເຊິ່ງ​ໄດ້​ກຳ­ນົດ​ໃນ​ກົດ­ໝາຍ​ໄດ້​ມີ​ຜົນ­ສຳ­ເລັດ​ໃນ​ຫຼາຍ​ດ້ານ ແລະ ເພື່ອ​ຮັບ­ປະ­ກັນ​ໃຫ້​ແກ່​ການ​ດຳ­ເນີນ​ກອງ​ປະ­ຊຸມ​ຄັ້ງ​ນີ້ ກໍ​ຄື​ການ​ກະ­ກຽມ​ກອງ​ປະ­ຊຸມ​ໃຫຍ່ ທ່ານ​ປະ­ທານ​ສູນ​ກາງ​ແນວ​ລາວ​ສ້າງ​ຊາດ ກໍ​ມີ​ບາງ​ຄຳ​ເຫັນ​ຄື: ໃຫ້​ເອົາ­ໃຈ­ໃສ່​ນຳ­ພາ ແລະ ເຂົ້າ​ຮ່ວມ​ບັ້ນ​ນຳ​ເນີນ​ຊີ­ວິດ​ການ­ເມືອງ​ຢ່າງ​ເລິກ­ເຊິ່ງ​ເຖິງ​ຖອງ ເພື່ອ​ສຳ​ຫຼວດ​ການ​ນຳ­ພາ​ຂອງ​ຄະ­ນະ​ບໍ­ລິ­ຫານ​ງານ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ໃນ 5 ປີ­ຜ່ານ­ມາ ຕິດ​ພັນ​ກັບ​ຂໍ້­ຄົງ­ຄ້າງ​ທີ່​ໄດ້​ຍົກ​ຂຶ້ນ​ຢູ່​ໃນ​ບົດ​ສຳ​ຫຼວດ​ນຳ​ພາ­ໃຫ້​ລະ­ອຽດ ຈະ­ແຈ້ງ ຍົກ​ໃຫ້​ເຫັນ​ດ້ານ​ດີ ສາ­ເຫດ ແລະ ບົດ­ຮຽນ​ທີ່​ຖອດ​ຖອນ​ໄດ້ ເພື່ອ​ພ້ອມ​ກັນ​ເສີມ​ຂະ­ຫຍາຍ ແລະ ນຳ­ພາ​ຂະ​ບວນ​ການ​ແມ່­ຍິງ​ເຂົ້າ​ຮ່ວມ​ພາ­ລະ­ກິດ ເພື່ອ​ປົກ​ປ້ອງ​ຮັກ­ສາ ແລະ ສ້າງ­ສາ​ປະ­ເທດ​ຊາດ​ໃນ­ຕໍ່­ໜ້າ ຍົກ​ໃຫ້​ເຫັນ​ສາ­ເຫດ​ທີ່​ພາ­ໃຫ້​ມີ​ຈຸດ​ອ່ອນ ຂໍ້­ຄົງ­ຄ້າງ ເພື່ອ​ຊອກ​ຫາ​ວິ­ທີ​ແກ້​ໄຂ​ໃນ­ຕໍ່­ໜ້າ​ຕາມ​ຂົງ­ເຂດ​ຄວາມ​ຮັບ­ຜິດ­ຊອບ​ຂອງ​ຕົນ ທີ່​ໄດ້​ຮັບ​ການ​ມອບ​ໝາຍ ແລະ ອື່ນໆ.

ຕິດຕໍ່ພວກເຮົາ
error: Content is protected !!