ຜັນຂະຫຍາຍວຽກງານວິທະຍາສາດເຕັກໂນໂລຊີ ເຂົ້າໃນການຜະລິດກະສິກຳ ແລະ ການບໍລິການ

ອະ­ນຸ​ກຳ­ມະ­ການ ສ້າງ​ຂະ​ບວນ​ການ-ໂຄ­ສະ­ນາ​ຂ່າວ­ສານ ຮ່ວມ​ກັບ 3 ອົງ​ການ­ຈັດ­ຕັ້ງ​ມະ­ຫາ­ຊົນ ຈັດ​ກອງ​ປະ­ຊຸມ​ວິ­ຊາ​ການ​ກ່ຽວ​ກັບ​ການ​ນຳ​ໃຊ້​ວິ­ທະ­ຍາ­ສາດ ເຕັກ​ໂນ​ໂລ​ຊີ ແລະ ນະ​ວັດ­ຕະ​ກຳ​ເຂົ້າ​ໃນ​ການ​ສົ່ງ­ເສີມ​ການ​ຜະ­ລິດ​ກະ­ສິ­ກຳ ແລະ ການ​ບໍ­ລິ­ການ ໃນ​ວັນ​ທີ 16 ກັນ­ຍາ 2020 ທີ່​ສະ​ຖາ​ບັນ​ການ​ຄຸ້ມ​ຄອງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ (ກວ​ຕ) ເປັນ​ປະ­ທານ​ຂອງ​ທ່ານ ບໍ່​ວຽງ​ຄຳ ວົງ​ດາ­ລາ ລັດ­ຖະ­ມົນ­ຕີ ກວ​ຕ ມີ​ຮອງ​ລັດ­ຖະ­ມົນ­ຕີ ຫົວ­ໜ້າ​ຫ້ອງ­ການ ກົມ ພະ​ແນກ ພະ­ນັກ­ງານ​ອ້ອມ​ຂ້າງ ກວ​ຕ ເຂົ້າ​ຮ່ວມ.

ໃນ​ກອງ​ປະ­ຊຸມ ທ່ານ ບໍ່​ວຽງ​ຄຳ ວົງ​ດາ­ລາ ກ່າວ​ວ່າ: ໃນ​ຍຸກ​ໂລ­ກາ​ພິ​ວັດ ກໍ​ຄື​ໃນ​ຍຸກ​ການ​ປະ­ຕິ­ວັດ​ອຸດ­ສາ­ຫະ­ກຳ ຄັ້ງ​ທີ 4 ( ອຸດ­ສາ­ຫະ­ກຳ 4.0 ) ທີ່​ມີ​ບົດ­ບາດ​ສຳ­ຄັນ​ຢ່າງ​ຍິ່ງ ມີ​ຫຼາຍ​ປະ­ເທດ​ໄດ້​ກຳ­ນົດ​ເອົາ​ເປັນ​ວາ­ລະ​ແຫ່ງ​ຊາດ ໃນ​ການ​ພັດ­ທະ­ນາ​ເສດ­ຖະ­ກິດ ແລະ ສັງ­ຄົມ ໃນ​ນັ້ນ ກວ​ຕ ໄດ້​ມີ​ຜົນ­ສຳ­ເລັດ​ການ​ຄົ້ນ­ຄວ້າ​ຈຳ­ນວນ​ໜຶ່ງ​ທາງ​ດ້ານ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ຄວາມ​ຮູ້​ບົ່ມ​ຊ້ອນ​ທາງ​ດ້ານ​ວິ­ຊາ​ການ ເພື່ອ​ໄປ​ຜັນ​ຂະ­ຫຍາຍ​ຊຸກ­ຍູ້ ສົ່ງ­ເສີມ​ການ​ຜະ­ລິດ​ກະ­ສິ­ກຳ ແລະ ການ​ບໍ­ລິ­ການ​ເພື່ອ​ການ​ຍົກ​ສະ­ມັດ​ຕະ​ພາບ ຄຸນ​ນະ​ພາບ​ຂອງ​ການ​ຜະ­ລິດ ແລະ ການ​ບໍ­ລິ­ການ ດ້ວຍ​ການ​ນຳ​ໃຊ້​ເຕັກ​ໂນ​ໂລ​ຊີ​ທີ່​ທັນ​ສະ­ໄໝ ເພື່ອ​ບຸກ​ທະ­ລຸ​ເປົ້າ​ໝາຍ​ພັດ­ທະ­ນາ​ຂອງ​ລັດ­ຖະ­ບານ ເປັນ­ຕົ້ນ ການ​ຫັນ​ເປັນ​ອຸດ­ສາ­ຫະ­ກຳ ແລະ ທັນ​ສະ­ໄໝ ການ​ຜະ­ລິດ ການ​ປຸງ​ແຕ່ງ ການ​ແປ​ຮູບ​ທາງ​ດ້ານ​ກະ­ສິ­ກຳ​ທີ່​ປະ­ເທດ​ເຮົາ​ມີ​ທ່າ­ແຮງ​ສູງ.

ຜົນ­ສຳ­ເລັດ​ທາງ​ດ້ານ​ການ​ຄົ້ນ­ຄວ້າ ແລະ ມີ​ຄວາມ​ຮູ້​ທາງ​ດ້ານ​ເຕັກ­ນິກ​ວິ­ຊາ​ການ ຕ້ອງ​ໄດ້​ແລກ­ປ່ຽນ ນຳ​ເອົາ​ຄວາມ​ຮູ້ ແລະ ວິ­ທະ­ຍາ­ສາດ ເຕັກ​ໂນ​ໂລ​ຊີ ມາ​ປະ­ສົມ​ປະ­ສານ​ຮ່ວມ​ກັນ​ໃນ​ການ​ສົ່ງ­ເສີມ​ການ​ຜະ­ລິດ​ກະ­ສິ­ກຳ ແລະ ບໍ­ລິ­ການ ເພື່ອ​ສ້າງ​ເປັນ​ໂຄງ­ການ​ຕົວ​ແບບ​ໃນ​ການ​ນຳ​ໃຊ້​ວິ­ທະ­ຍາ­ສາດ ເຕັກ​ໂນ​ໂລ​ຊີ ແລະ ນະ​ວັດ­ຕະ​ກຳ​ທີ່​ກ້າວ­ໜ້າ​ທັນ​ສະ­ໄໝ ແລະ ເໝາະ​ສົມ ຕອບ​ສະ­ໜອງ​ຄວາມ​ຕ້ອງ­ການ​ຂອງ​ທ້ອງ­ຖິ່ນ ແລະ ປະ­ຊາ­ຊົນ ໃນ​ການ​ຍົກ​ລະ­ດັບ​ການ​ຜະ­ລິດ​ຄຸນ​ນະ​ພາບ​ຫຼາຍ​ຂຶ້ນ ແລະ ກວ້າງ­ຂວາງ​ກວ່າ​ເກົ່າ ນອກ­ຈາກ​ນີ້ ກອງ​ປະ­ຊຸມ​ຍັງ​ໄດ້​ຮັບ​ຟັງ​ການ​ນຳ​ສະ­ເໜີ​ກ່ຽວ​ກັບ​ກອງ​ທຶນ ແລະ ການ​ຄົ້ນ­ຄວ້າ​ວິ­ທະ­ຍາ­ສາດ ການ​ສົ່ງ­ເສີມ​ຖ່າຍ​ທອດ ແລະ ນຳ​ໃຊ້​ວິ​ທະ​ນາ​ສາດ ແລະ ເຕັກ​ໂນ​ໂລ​ຊີ​ເພື່ອ​ຍົກ​ສະ­ມັດ​ຕະ​ພາບ​ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ ການ​ນຳ​ໃຊ້ ແລະ ການ​ພັດ­ທະ­ນາ​ເຕັກ​ໂນ​ໂລ​ຊີ​ດີ​ຈີ​ຕອນ ເພື່ອ​ພັດ­ທະ­ນາ​ເສດ­ຖະ­ກິດ-ສັງ­ຄົມ ການ​ນຳ​ໃຊ້​ພະ­ລັງ­ງານ​ທົດ​ແທນ​ເຂົ້າ​ໃນ​ການ​ຜະ­ລິດ​ເປັນ​ສິນ­ຄ້າ ການ​ຄົ້ນ­ຄວ້າ​ເຕັກ​ໂນ​ໂລ​ຊີ​ແບບ​ຊີ­ວະ​ພາບ ເຂົ້າ​ໃນ​ການ​ສົ່ງ­ເສີມ​ການ​ຜະ­ລິດ​ກະ­ສິ­ກຳ ພ້ອມ​ທັງ​ແລກ­ປ່ຽນ​ຄຳ​ຄິດ​ເຫັນ​ເຊິ່ງ​ກັນ ແລະ ກັນ​ອີກ​ດ້ວຍ.

ຕິດຕໍ່ພວກເຮົາ
error: Content is protected !!