ໂຄວິດ-19 ຖະຫຼົ່ມເສດຖະກິດໂລກ

ຫາກ​ເພື່ອນ​ຜູ້​ອ່ານ​ຕິດ­ຕາມ​ຄໍ​ລຳ​ພວກ​ເຮົາ​ຈະ​ເຫັນ​ວ່າ ມີ​ການ​ນຳ​ສະ­ເໜີ​ກ່ຽວ​ກັບ​ການ​ລະ­ບາດ​ຂອງ​ພະ­ຍາດ​ໂຄ​ວິດ-19 ໃນ​ແງ່​ການ​ຊອກ​ວັກ​ຊິນ ເພື່ອ​ສູ້​ກັບ​ພະ­ຍາດ​ດັ່ງ­ກ່າວ ລວມ​ເຖິງ​ການ​ຄາດ​ຄະ­ເນ​ລາ­ຄາ​ວັກ​ຊິນ ມື້­ນີ້​ຜູ້​ຂຽນ​ໄດ້​ມີ​ຂໍ້​ມູນ​ທີ່​ກະ­ທົບ​ເຖິງ​ເສດ­ຖະ­ກິດ​ຂອງ​ໂລກ ມັນ​ເປັນ​ອີກ​ແງ່​ມຸມ​ໜຶ່ງ ໃຫ້​ເພື່ອນ​ຜູ້​ອ່ານ​ກຳ​ໄດ້​ນັ້ນ ແມ່ນ​ບົດ​ວິ­ເຄາະ​ໃນ​ຫົວ­ຂໍ້ “ໄພ​ອັນ­ຕະ­ລາຍ​ຂອງ​ພື້ນ­ຖານ​ເສດ­ຖະ­ກິດ​ໂລກ” ເຊິ່ງ​ແມ່ນ​ວິ­ທະ­ຍຸ​ກະ­ຈາຍ­ສຽງ​ຫວຽດ­ນາມ (VOV World) ລົງ​ພິມ​ໃນ​ວັນ​ທີ 11 ກັນ­ຍາ 2020 ໂດຍ​ມີ​ບາງ​ຈຸດ​ສຳ​ຄັນ­ວ່າ: …ຍ້ອນ​ຖືກ​ຜົນ​ກະ­ທົບ​ຢ່າງ​ໜັກ­ໜ່ວງ​ຈາກ​ໂຣກ​ລະ­ບາດ​ໂຄ​ວິດ-19 ພື້ນ­ຖານ​ເສດ­ຖະ­ກິດ​ພວມ​ປະ​ເຊີນ​ໜ້າ​ກັບ​ສະ­ພາບ​ຖົດ​ຖອຍ​ຢ່າງ​ແຮງ ແບບ​ບໍ່​ເຄີຍ​ມີ​ມາ​ກ່ອນ​ໃນ​ຫຼາຍ​ທົດ​ສະ​ວັດ​ຜ່ານ​ມາ ຊ້ຳ­ບໍ່­ໜຳ ມີ​ບົດ​ຕີ​ລາ­ຄາ​ບາງ​ບົດ​ຍັງ​ຄາດ​ຄະ­ເນ​ວ່າ: ເສດ­ຖະ­ກິດ​ທົ່ວ​ໂລກ ອາດ​ຈະ​ຕົກ​ເຂົ້າ​ສູ່​ສະ­ພາບ​ການ​ຊຸດ­ໂຊມ​ຢ່າງ​ຮ້າຍ​ແຮງ​ທີ່​ຄ້າຍ­ຄື​ກັນ ຫຼື ຮ້າຍ​ແຮງ​ກວ່າ​ການ​ຊຸດ­ໂຊມ ໃນ​ຊຸມ​ປີ 1930 ຂອງ​ສະ­ຕະ­ວັດ​ກ່ອນ.

ໃນ​ບົດ​ໄຈ້​ແຍກ​ລວມ​ທີ່​ໄດ້​ເອົາ​ລົງ​ໃນ​ວາ­ລະ­ສານ Foreign Policy ໃນ​ວັນ​ທີ 9 ກັນ­ຍາ ທັງ​ຜູ້­ອຳ­ນວຍ­ການ​ໃຫຍ່​ກອງ​ທຶນ​ເງິນ­ຕາ​ສາ­ກົນ (IMF) ທ່ານ Kristalina Georgieva ແລະ ຫົວ­ໜ້າ​ນັກ­ເສດ­ຖະ­ກິດ​ຂອງ​ກອງ​ທຶນ​ເງິນ­ຕາ​ສາ­ກົນ ທ່ານ Gita Gopinath ກ່າວ​ເຕືອນ​ວ່າ: ວິ​ກິດ​ການ​ເສດ­ຖະ­ກິດ​ທົ່ວ​ໂລກ​ໃນ​ປັດ­ຈຸ­ບັນ ຍັງ​ຈະ​ແກ່­ຍາວ​ໄປ​ອີກ ຄວາມ​ສາ­ມາດ​ຟື້ນ​ຟູ​ແມ່ນ​ບອບ​ບາງ​ທີ່​ສຸດ ແລະ ບໍ່​ສະ​ໝ່ຳ​ສະ­ເໝີ​ລະ­ຫວ່າງ​ບັນ­ດາ​ເຂດ ແລະ ບັນ­ດາ​ຂົງ­ເຂດ ຄຳ​ກ່າວ​ເຕືອນ​ດັ່ງ­ກ່າວ​ໄດ້​ຍົກ​ອອກ​ມາ​ໃນ​ສະ­ພາບ​ການ​ໂຣກ​ລະ­ບາດ​ໂຄ​ວິດ-19 ສືບ­ຕໍ່​ມີ​ການ​ຜັນ​ແປ​ຢ່າງ​ສັບ­ສົນ​ໃນ​ຂອບ​ເຂດ​ທົ່ວ​ໂລກ ຫຼາຍ​ປະ­ເທດ​ຕ້ອງ​ຈັດ​ວາງ​ບັນ­ດາ​ມາດ​ຕະ­ການ​ຄວບ​ຄຸມ​ຢ່າງ​ເຄັ່ງ​ຄັດ ເປັນ­ຕົ້ນ​ແມ່ນ​ປິດ​ປະ­ຕູ​ດ່ານ​ຊາຍ​ແດນ​ປິດ​ລ້ອມ​ສ່ວນ​ໜຶ່ງ ຫຼື ທົ່ວ​ປະ­ເທດ ຈຳ­ກັດ​ການ­ເຄື່ອນ­ໄຫວ​ຜະ­ລິດ ດຳ­ເນີນ​ທຸ­ລະ​ກິດ… ອັນ​ໄດ້​ສົ່ງ​ຜົນ​ກະ­ທົບ​ຢ່າງ​ຮ້າຍ​ແຮງ​ເຖິງ​ລະ­ບົບ​ການ​ສະ­ໜອງ​ທົ່ວ​ໂລກ ຜົນ​ຕາມ​ມາ​ແມ່ນ​ບັນ­ດາ​ດັດ­ຊະ­ນີ ແລະ ການ​ຄາດ​ຄະ­ເນ​ແງ່​ຫວັງ​ເສດ­ຖະ­ກິດ​ມືດ​ມົວ ຖືກ​ຍົກ​ອອກ​ຢ່າງ​ຕໍ່​ເນື່ອງ.

ວົງ​ການ​ນັກ​ໄຈ້​ແຍກ Wall Street ປະ­ເທດ​ອາ​ເມ​ຣິ​ກາ ໄດ້​ໃຫ້​ຂໍ້​ສັງ­ເກດ​ວ່າ ໂຣກ​ລະ­ບາດ​ໂຄ​ວິດ-19 ຈະ​ເຮັດ​ໃຫ້ GDP ທົ່ວ​ໂລກ​ເສຍ​ຫາຍ​ເຖິງ 5.000 ຕື້ USD ສ່ວນ​ຕາມ​ກອງ​ທຶນ​ເງິນ­ຕາ​ສາ­ກົນ ໄດ້​ຄາດ​ຄະ­ເນ​ວ່າ ເສດ­ຖະ­ກິດ​ທົ່ວ​ໂລກ​ຈະ​ເຕີບ​ໂຕ -4,9% ໃນ​ປີ 2020 ໃນ​ນັ້ນ ບັນ­ດາ​ພື້ນ­ຖານ​ເສດ­ຖະ­ກິດ ພັດ­ທະ­ນາ​ຈະ​ເຕີບ​ໂຕ -8% ບັນ­ດາ​ພື້ນ­ຖານ​ເສດ­ຖະ­ກິດ​ຫາ​ກໍ​ພົ້ນ​ເດັ່ນ ຈະ​ເຕີບ​ໂຕ -3% ຄ້າຍ­ຄື​ກັນ​ນີ້ ທະ­ນາ­ຄານ​ໂລກ (WB) ກໍ​ໃຫ້​ຂໍ້​ສັງ­ເກດ​ວ່າ ເສດ­ຖະ­ກິດ​ໂລກ​ປີ​ນີ້ ຈະ​ເຕີບ​ໂຕ -5,2% ໃນ​ນັ້ນ ບັນ­ດາ​ພື້ນ­ຖານ​ເສດ­ຖະ­ກິດ​ພັດ­ທະ­ນາ ຈະ​ເຕີບ​ໂຕ -7% ແລະ ບັນ­ດາ​ພື້ນ­ຖານ​ເສດ­ຖະ­ກິດ​ຫາ​ກໍ​ພົ້ນ​ເດັ່ນ ຈະ​ເຕີບ​ໂຕ -2,5%.

ປະ­ເທດ​ອາ​ເມ​ຣິ​ກາ ເຊິ່ງ​ເປັນ​ພື້ນ­ຖານ​ເສດ­ຖະ­ກິດ​ໃຫຍ່​ທີ່​ສຸດ​ໃນ​ໂລກ ແລະ ກໍ​ແມ່ນ​ປະ­ເທດ​ຖືກ​ຜົນ​ກະ­ທົບ​ຢ່າງ​ໜັກ­ໜ່ວງ​ທີ່​ສຸດ ຈາກ​ໂຣກ​ລະ­ບາດ​ໂຄ​ວິດ-19 ນັບ​ທັງ​ຈຳ­ນວນ​ຜູ້​ຕິດ­ເຊື້ອ ແລະ ຈຳ­ນວນ​ຜູ້​ເສຍ​ຊີ­ວິດ ໃນ​ໄຕ​ມາດ II ຜ່ານ​ມາ ໄດ້​ມີ​ລະ­ດັບ​ເຕີບ​ໂຕ GDP ແມ່ນ -9,1% ເຊິ່ງ​ຫຼາຍ​ກວ່າ​ທົບ​ຫຼາຍ​ເທົ່າ ເມື່ອ​ທຽບ­ໃສ່​ລະ­ດັບ -1,3% ຂອງ​ໄຕ​ມາດ l ກອງ​ທຶນ​ເງິນ­ຕາ​ສາ­ກົນ ໄດ້​ຄາດ​ຄະ­ເນ​ວ່າ ເສດ­ຖະ­ກິດ​ອາ​ເມ​ຣິ​ກາ ທັງ​ປີ 2020 ຈະ​ຫຼຸດ​ລົງ 6,6% ບາງ​ອົງ­ການ​ການ​ເງິນ​ຍັງ​ຄາດ​ຄະ­ເນ​ວ່າ ເສດ­ຖະ­ກິດ​ອາ​ເມ​ຣິ​ກາ ໃນ​ປີ 2020 ນີ້ ອາດ​ຈະ​ຊຸດ­ໂຊມ​ລົງ​ຫຼາຍ​ກວ່າ 8% ເຊິ່ງ​ເປັນ​ລະ­ດັບ​ທີ່​ບໍ່​ເຄີຍ​ມີ​ມາ​ກ່ອນ​ໃນ​ຫຼາຍ​ທົດ​ສະ​ວັດ​ຜ່ານ​ມາ.

ສ່ວນ​ຢູ່​ເອີ​ຣົບ ພື້ນ­ຖານ​ເສດ­ຖະ­ກິດ​ໃຫຍ່​ທີ່​ສຸດ​ໃນ​ທະ­ວີບ ຄື: ເຢຍ​ລະ​ມັນ ກໍ​ຢັ້ງ­ຢືນ​ລະ­ດັບ​ຊຸດ­ໂຊມ ເຖິງ 10,1% ໃນ​ໄຕ​ມາດ II/2020 ໃນ​ຂະ­ນະ​ທີ່​ພື້ນ­ຖານ​ເສດ­ຖະ­ກິດ​ຢູ່​ພາກ​ພື້ນ Eurozone ຫຼຸດ​ລົງ 12,1%.

ຕາມ​ວົງ​ການ​ນັກ​ໄຈ້​ແຍກ​ແລ້ວ ນີ້​ແມ່ນ​ຕົວ​ເລກ​ເປັນ​ໜ້າ​ເຕືອນ​ໄພ​ຢ່າງ​ແທ້​ຈິງ ເຊິ່ງ​ໄດ້​ຊີ້​ໃຫ້​ເຫັນ​ວ່າ ວິ​ກິດ​ການ​ເສດ­ຖະ­ກິດ​ໃນ​ປັດ­ຈຸ­ບັນ ພວມ​ມີ​ການ​ຜັນ​ແປ​ຢ່າງ​ຮ້າຍ​ແຮງ​ກວ່າ​ຫຼາຍ​ເທົ່າ ເມື່ອ​ທຽບ­ໃສ່​ວິ​ກິດ​ການ​ດ້ານ​ການ​ເງິນ​ທົ່ວ​ໂລກ ໃນ​ຊຸມ​ປີ 2008-2009 ຊ້ຳ­ບໍ່­ໜຳ​ຍັງ​ຮ້າຍ​ແຮງ​ກວ່າ​ການ​ຊຸດ­ໂຊມ​ຄັ້ງ​ໃຫຍ່​ໃນ​ຊຸມ​ປີ 1930 ອີກ​ດ້ວຍ… ສະ­ເໜີ​ຂໍ້​ມູນ​ນີ້ ເພື່ອ​ຢາກ​ໃຫ້​ເພື່ອນ​ຜູ້​ອ່ານ​ກຳ​ໄດ້​ວ່າ ສະ­ພາບ​ເສດ­ຖະ­ກິດ​ມັນ​ເປັນ​ທົ່ວ​ໂລກ ແລະ ເປັນ​ອັນ​ທີ່​ແນ່­ນອນ​ວ່າ ມັນ​ກໍ​ຈະ​ສົ່ງ​ຜົນ​ກະ­ທົບ​ຕໍ່​ປະ­ເທດ​ເຮົາ ຢ່າງ​ຫຼີກ​ລ່ຽງ​ໄດ້​ຍາກ.

ສະ­ນັ້ນ ຈົ່ງ​ພ້ອມ​ກັນ​ຜ່ານ​ຜ່າ​ວິ​ກິດ​ການ​ຄັ້ງ​ນີ້​ໄປ​ດ້ວຍ​ກັນ.

ໂດຍ: ແນວ​ລາວ

ຕິດຕໍ່ພວກເຮົາ
error: Content is protected !!